Policia rritë gatishmërinë!
14/12/2009
Prej ditës kur Maqedonia nuk morri datë për negociata me Bashkimin Evropian, siguria në vend është rritur. Burime të gazetës “Lajm” kanë njoftuar se policia dhe ushtria, kanë ngritur nivelin e gatishmërisë. Në veçanti, Ministria e Punëve të Brendshme (MPB) u ka dërguar urdhër policisë kufitare që të jetë më syçelë në këtë periudhë, sidomos deri në pranverë. “Duhet të jemi më syçelë, në këtë periudhë. Mund të ndodhin situata të paparashikuara”, tha një polic nga policia kufitare.
Zëdhënësi i MPB-së, Borçe Pesheski nuk ka pohuar se ka ngritje të shkallës së gatishmërisë dhe nivelit të rrezikut në Maqedoni. “Mund t’ju them se gjithçka është në rregull dhe nuk ka asnjë masë shtesë që e ka marrë MPB. Të gjitha kontrollet zhvillohen siç janë zhvilluar deri më tani, në kuadër të normales. Edhe policia kufitare vazhdon me masat e njëjta”, tha Peshevski.
Shumë politikanë dhe analistë kishin paralajmëruar se pas 7 dhjetorit, nëse nuk merret datë për bisedime me BE-në, mund të ndodhin trazira të ndryshme. Konflikte kësaj radhe nuk do të ketë nga pala shqiptare, por përplasjet mund të ndodhin në taborin maqedonas. Një pjesë e qytetarëve kërkojnë me ngulm që Maqedonia të futet në BE dhe NATO duke kërkuar zgjedhje të kontestit me Greqinë, kurse një pjesë tjetër kundërshtojnë kategorikisht të ndërrojnë edhe një shkronjë nga emri dhe identiteti maqedonas.
Burime brenda policisë kufitare pohojnë se urdhri ka ardhur që të ruhet në mënyrë të mirëfilltë vija kufitare Greqi-Maqedoni dhe Kosovë-Maqedoni. “Mund të ndodhin incidente të ndryshme në kufirin me Greqinë dhe pastaj të përdoren si argumente për keqësimin e marrëdhënieve mes dy vendeve. Për këtë arsye policia duhet të kontrollojë mirë çdo pëllëmbë të vijës kufitare”, thotë ky burim.
Edhe në armatën e Maqedonisë ka ngritje të gatishmërisë. “Gjatë tërë kohës jemi me armatim, kurse gati çdo natë jepet alarm. Nuk e kemi të qartë nëse bëhet fjalë për një nga provokimet dedikuar Greqisë”, pohojnë burime nga ARM-ja.
Ndryshe, Maqedonia plotësisht i ka ftohur marrëdhëniet me Greqinë pas pengimit në Këshillin e Ministrave të caktohet datë për Maqedoninë për t’i filluar negociatat për hyrje në BE. Kryeministri Nikolla Gruevski dhe presidenti Gjoge Ivanov, kanë akuzuar Greqinë si fajtorja kryesore për shuarjen e ëndrrës maqedonase për hyrje në BE. Ata edhe në takimet me ndërkombëtarët kanë kërkuar që të ndëshkohet Greqia, si fajtore e bllokimit të rajonit në rrugën e integrimit evropian.
http://lajmpress.com/lajme/maqedoni/2555.html